Greinasafn eftir: Freyr

Steðji Reyktur Bjór

Mynd | Posted on by

Steðji Reyktur Bjór

Steðji er nýjasta brugghúsið á Íslandi.  Þetta er dálítið skrítið lítið brugghús í Borgarfirðinum.  Þeir byrjuðu að gera frekar einfaldan lager með líklega ljótasta merkimiða sem sést hefur.  Þeir hafa reyndar lagað aðeins til merkimiðann og er hann þolanlegur núna.  Þeir hafa svo gert jólabjór, páskabjór, dökkan bjór, sítrusbjór og svo þennan reykta bjór.  Reyndar sá ég í hillum ÁTVR áðan jarðaberjabjór en mig langaði bara ekki að prófa hann í dag.  Greip þennan þar sem reykbjórar eru dálítið skemmtilegur bjórstíll og hafa ekki sést úr íslensku brugghúsi til þessa.

Sá harði myndi segja: Bjór þessi er dökkbrúnn eða dimmrauður í glasi, eins og rauðvín með froðu. Froðan hverfur frekar fljótt og er dálítið sápuleg að þéttleika.  Froðan hangir þó í glasinu -lacing!! og fær bjórinn smá plús fyrir það. Í nefi er reyktur keimur, alls ekki áberandi en vel greinanlegur.  minnir á mjög mild viðarkol.  Fyrir bjórnördið mætti þetta vera þróttmeiri lykt en samt flott byrjun.  Í munni er hann mildur, gosríkur með látlausa beiskju.  Reykurinn er áberandi en langt frá því að vera allsráðandi.  Þetta er meira eitthvað sem liggur í bakgrunni.  Örlítill reykur í eftirbragði.   Fyrir hinn harða bjórnörd myndi þessi bjór líkast til ekki fara hátt í verðlaunastiganum.  Hann fær þó stig fyrir effort, þetta er amk ekki sama lagersullið sem menn virðast alltaf detta í.  Ég veit þó að menn vilja mun meiri reyk, reykjarkóf alveg hreint.

Fyrir þann græna held ég að þetta sé varasamur bjór. Sá græni myndi líklega strax snúa við við merkimiðann „Reyktur bjór“ er allt of „hættulegt“.  En er maður leggur í smá ævintýramennsku, lifir aðeins á brúninni og prófar þá kannski kemst maður að því að þessi reykur er mjög látlaus og ef maður spáir aðeins í það þá er þetta virkilega skemmtilegur matarbjór.  T.d. með grillmeti hverskonar.  Smá BBQ fílingur passar vissulega vel við á pallinum eða hvað?  Já sá græni vill meina að það sé vert að prófa, bara til að hafa prófað en er hræddur um að margur grænjaxlinn muni ekki vera of kátur.

Bjór og ostar!

Birt þann af


Þegar við vorum síðast á ferðalagi um París sumarið 2012 lifðum við á ostum af ýmsu tagi.  Franskir ostar eru einfaldlega ómótstæðilegir.  Rauðvín og ostar er álíka þekkt „kombó“ og „humar og hvítt“ enda algjörlega dásamleg blanda.  Frakkar eru ekki þekktir fyrir bjórgerð en þeir gera ágætis rauðvín og því var það ósjaldan drukkið með á ferðum okkar um borgina.  Hins vegar erum við mikið bjórfólk og ákv að nota tækifærið og reyna nokkrar paranir.  Lagerinn finnst á hverju strái en maður vill fara í meiri alvöru bjór með ostum.  Ef valið er á milli rauðvíns og lagers þá vel ég alltaf rauðvínið með þessum kræsingum.

Það er hægt að finna amk tvær bjórbúðir sem selja vandaðan sælkerabjór og því hægt að láta aðeins á reyna.  Ostar eru af ýmsum gerðum og styrkleika líkt og bjórinn og því þarf að hafa í huga hvers slags ost um ræðir hverju sinni.  Algjörlega smekksatriði hvers og eins samt.  Við viljum þó ekki rótsterkan bjór sem algjörlega stelur senunni.  Ég myndi t.d. forðast Imperial IPA og jafnvel venjulegan IPA einnig.  Reynið frekar  Stout t.d. eða Imperial Stout sem einnig mjög vel við. Jafnel dálítið reyktur Stout eins og okkar íslenski Lava sem er þróttmikill með reyktum undirtón sem minnir dálítið á reykta pylsu en það er jú vel þekkt meðlæti á ostabakkanum.  Lava er þó ekki allra og ég er ekki viss um að sá græni myndi sætta sig við hann!  Porter á einnig mjög vel við, hann er töluvert léttari og mildari en stout bjórarnir en samt má finna þessa létt ristuðu tóna og jafnvel örlítið súkkulaði.  Myrkvi frá Borg er mjög gott alíslenskt dæmi um góðan ostabjór.

Það er ekki hægt að fjalla um osta án þess nefna til sögunnar Trappist bjórana.  Bjórinn sem bruggaður er af alvöru munkum í alvöru klaustrum.  Þessir bjórar eru þróttmiklir, vel frúttaðir oft á tíðum og kryddaðir og skemmtilegir.  Ekki humlar að trufla eða brennt malt.  Einstakur stíll.  Þessir karlar passa einkar vel með ostum og er kannski ekki skrítið að þau 8 Trappist brugghús sem til eru brugga vel flest einnig gómsæta osta til að njóta með bjórnum. Ég er mjög hrifinn af Chimay Tripel eða Westmalle Tripel með ostabakkanum mínum.  Bjór þessi er heldur áfengisríkur og gefur hita og gleði sem passar vel á köldu vetrarkvöldi án þess að yfirgnæfa ostinn.  Kannsi þó betra að hafa kremaða osta með þessum og dálítið bragðmikla.  Hins vegar er vel hægt að fara í mildari belgísku blond bjórana Leffe eða hollenska afbrigðið La Trappe blond ofl.  Þessi stílar eru þekktir fyrir að bera nokkurn ávaxtakeim, eru „frúttaðir“ eins og ég kalla það stundum en það er jú eitthvað sem passar á ostabakkann, vínber, jarðaber ofl ekki satt?

Það væri gaman að heyra frá ykkur ef þið prófið þetta.