Þegar heimabrugg er tekið á næsta stig!

Þegar heimabrugg er tekið á næsta stig!

Stundum er ég svo heppinn að það rata á borð til mín skemmtilegir karlar úr smiðjum heimabruggara landins. Að þessu sinni er það Digri brugghús sem lofar mér að smakka.  Ég hef smakkað frá þeim tvo bjóra áður og var ég sérlega ánægður með Batman í Blautri Skikkju frá þeim, virkilega flottur imperial stout þar. Í kvöld er það hins vegar bjór sem ég hef reyndar vitað af lengi og segja má að ég hafi fylgst með fæðingu hans í gegnum munnmæli Digra manna, Imperial Stout heitir hann bara.  Ekki datt mér í hug að ég fengi smakkprufu frá þeim félögum því um afar lítið upplag er að ræða og bjórinn ofsalega spennandi og má segja afar sjaldgæfur bjór, hér á landi amk.  Ég nánast leyfi mér að fullyrða að enginn hefur bruggað svona bjór hér á landi áður.  Vissulega kannski svipað „konsept“ en ekki með svona sögu.  Já Digri notar nefnilega notaða Bourbon Whisky tunnu frá Mikkeller sem hefur verið notuð til að þroska bjór-whisky í svo kölluðu spirits verkefni Mikkellers.  Hefur einhver gert það áður hér?  Hvað sem því líður, hér er maður vitni af því þegar heimabrugg er komið á næsta stig…..“beond homebrew“ hvorki meira né minna.  Þessi magnaði bjór hefur allt að bera og jafnvel umbúðirnar gefa skýr skilaboð um fágaða og vandaða vöru.  Sjálfur hef ég verið með á „todo“ listanum mínum lengi að vaxa flöskutappann á mínu heimabruggi líkt og Mikkeller, Three Floyds og allir þessir stóru flottu gera svo gjarnan með eðalölið sitt.  Hingað til hef ég bara ekki gert nógu flott og pótent öl sem á það skilið.  Digri er hér kominn með öl sem eiginlega verður bara að vera innsiglað á svona elegant máta.  Miðinn er svo annað mál og ekki minna en þar má sjá virkilega elegant en einfalda mynd sem kemur afar smekklega út.  Fullt hús stiga fyrir umbúðirnar.

Bjórinn er kolsvartur og flottur með nettan froðuhaus sem heldur velli.  Ég valdi að sjálfsögðu flott Mikkeller glas undir þennan Digra/Mikkeller fusion bjór ef svo má segja.  Það er svo ofsalega flottur kemur í nefi þar sem viður er áberandi og klárlega whisky.  Það er svo ööööörlítill aukakeimur sem ég stundum finn af heimabruggi og stundum truflar mig.  Veit ekki hvaða þetta kemur, í kvöld hins vegar er svo mikið annað sem fangar athygli mína í nefi að þetta truflar alls ekkert.
Í munni er mikið að gerast, gríðarlegt bragð, mikill hiti og hamagangur og svo er bourbon whisky allsráðandi.  Ofsalega flottur keimur.  Humlar gefa einnig flotta beiskju og svo kemur einhver notaleg vínleg sæta fram þegar líður á.  Eftirbragð hugljúft og gott og maður einfaldlega verður að drífa sig í næsta sopa.

Já þessi guttar eiga hrós skilið, þennan bjór gæti maður hæglega séð á svona 2000 kr í ÁTVR ef hann væri í sölu.  Kærar þakkir fyrir mig!!!

Auglýsingar

Batman í Blautri Skikkju

Batman í Blautri Skikkju

Það er alltaf gaman að sjá hvað menn eru að pukra í skúrnum heima hjá sér.  Stundum er maður svo heppinn að fá smakkprufur af þessu gulli sem menn luma oft á.  Hér hefur mér áskotnast ofsalega flottan Imperial Stout frá gaurum er kalla sig Digri brugghús. Bjórinn kalla þeir Batman í Blautri Skikkju. Ég er ekki klár á prósentunni en gaman væri að fá kannski komment hér að neðan með þær upplýsingar frá viðkomandi bruggmeisturum.

Ég verð að segja að þessi bjór kom mér alveg í opna skjöldi.  Ég bjóst ekki við miklu, í fyrsta lagi vegna þess að ég er ekki mikið fyrir Imperial Stout, eða kannski frekar, ég er mjög kresinn á stílinn, þeir falla ekki allir í kramið.  Í öðru lagi er um heimabrugg að ræða og þar geta menn bæði gert ofsalega vondan bjór eða virkilega góðan. Maður veit ekki hvar á skalanum maður lendir fyrirfram.  Þessi var hins vegar algjörlega eitthvað sem smellpassar að mínum smekk, þróttmikill, fullskrokka monster með sætum undirtón. Það eina sem truflaði mig var kannski dálítið áberandi spritt?  Ef þessi stæði mér til boða í vínbúðinni myndi ég klárlega velja hann reglulega í körfuna mína.  Frábær bjór.  Takk fyrir mig.  Væri gaman að heyra hver höfundurinn er af merkimiðanum.

c

Citra IPA frá Digra brugghús.

Báran var svo sem ekki stök í þetta skiptið heldur flaut með annar bjór frá þeim félögum sem þeir kalla líklega bara Citra IPA ég er ekki viss.  Það er amk bara notaður Citra humall í þennan bjór ef ég hef það rétt eftir.  Prósentan á huldu en líklega í kringum 4.5-5.5%.  Citra er dálítið nýlunda humalafbrigði sem menn eru farnir að fikta dálítið við að nota í bjórinn.  Humallinn er alls ekki allra, sumir elska hann á meðan aðrir hata hann.  Humall þessi er fremur hár í svo kölluðum alfa sýrum og er hann því fremur bitur og því unt að ná fram nokkuð beiskum bjór (hátt IBU hlutfall).  Það eru einnig áberandi sítrus tónar í þessum karli.

En já bjórinn, i honum er ágætis fylling, flott beiskja og notalegur maltkeimur. Mjög ljúfur í nefi með nettum humalkeim og sítrus.  Það er hins vegar pínu funky eftirkeimur? Spurning hvort það sé humallinn eða eitthvað annað?  Virkilega gaman að bragða þetta.

Takk kærlega fyrir mig.  Við skulum sjá hvort einhverjum takist að slá þessa tvo út eða jafna 🙂

Endilega að bæta við réttum upplýsingum og ég mun uppfæra, þið sem þekkið til, hinir Digru.